Raakvatters. Dís wat ouma se generasie vrouens was. Daar’s tonne goed wat ouma toe-oog kon doen wat vandag grootliks vergete is. Vir sommige het ek nie juis in 2018 nut nie. Soos om beesvet in seep te verander. Mens, die héle kombuis ruik. Ek koop eerder daai oranje Pears-sepie. Of soos om doilies en jassies vir houthangers te hekel. Tierlantyntjies vir uitstal op ’n doilie die het ek nie. En my hangers is plastiek. Ek koop hulle 10 vir R30 van die knaap wat op die hoek van Parkweg en Liesbeek smous.

Ouma se manier met kos is ’n perd van ’n ander kleur. Ek wens ek het meer tyd gehad om by haar te leer. Botter karing, kaas maak, troukoek versier… Alles kinderspeletjies vir ouma. En dan was daar haar manier met vleis. Sy was miskien nie ’n raps oor die vyf voet nie, maar daai vrou kon ’n vark of skaap karkas in onder ’n halfuur eiehandig kafdraf en in die vrieskas kry. ’n Bees het haar miskien bietjie langer gevat, maar nie veel nie.

En as die slag verby was, was daar die kook. Lank en stadig in ’n lae oond was hoe sy dit verkies het, perfek vir enige boud, maar ook vir ander dele. Dele soos nek. Ouma het haar heel skaapnek net gesout, bruin gebraai in beesvet (oftewel ‘dripping’ soos sy dit genoem het) en in die oond gesit. Wat daar uitgekom het na vier ure was hemels.

Ek maak soos sy gemaak het, maar neem dit ’n stappie verder. Die heel skaapnek sit ek op ’n bed wortels, klein uitjies en kruie. As hy eers sag is gooi ek botterbone by en druk hulle met ’n vurk in daai lamryke roostersousie in, en dan kry hy gremolata. Dis heel skaapnek, ámper soos ouma hom gemaak het.

Al wat jy nodig het is…

1 medium-groot heel skaapnek
4 groot wortels, geskil en in groterige stukke gesny
6-8 pekel-uie, geskil en in die helfte gesny met die lengte langs
2 heel huisies knoffel, ongeskil
2 takkies tiemie
1 takkie roosmaryn
2 lourierblare (vars, nie gedroog nie)
½ koppie water
sout en peper
goeie olyfolie
1 blik botterbone, gedreineer
groot handvol pietersielie, sonder stingels
1 suurlemoen

Voorverhit jou oond tot 160 grade Celsius. Pak die wortels en uie in ’n groot roosterbak met ’n deksel. Sit die tiemie, roosmaryn, knoffel en lourierblare by en gee die lot ’n klein skeut olyfolie, ’n paar draaie sout en growwe swartpeper. Verhit ’n dikbodempan en gee dit ’n blerts olyfolie. Bestrooi die skaapnek mildelik met sout en verbruin dit alkant in die olyfolie. Sit die skaapnek op die groente, gooi die water by, sit die deksel op en gooi die knaap in die oond vir vier ure.

Na vier ure behoort hy smelt-in-die-mond sag te wees . Gooi die botterbone by en roer deur sodat dit met die groente in die bodem meng. Rooster vir ’n verdere halfuur sonder die deksel sodat daai vetlagie van die nek lekker brosbruin word. Druk die knoffel (wat teen die tyd puree sal wees) uit hulle huisies en roer in die groente in. Gee die groente ’n drukkie suurlemoensap, en proe of dit nog sout of peper nodig het. Bedien die skaapnek op die groente en strooi pietersielie gemeng met fyn gerasperde suurlemoenskil oor die lot. ’n Paar bitter blare soos roket gekus met olyfolie en suurlemoensap is heel gaaf hierby. Ek is meer van die dik-eet as dun-eet oortuiging. ’n Hele nek is egter te veel vir my. Hierdie resep gemaak met ’n 15cm skaapnek is meer as genoeg vir twee om aan te smul.

bedien

2

vooraf

15 min

kook

4.5 ure

scroll-main

Also available in: English