Dis hoogsomer en een van my grootste vreugdes (afgesien van kort rokke en oop tone natuurlik) is buite eet – in die sagte skadu van die groot boom neffens my kombuisdeur. Vars mossels is altyd ’n goeie idee, nog meer so gekombineer met plompe ryprooi tamaties op hulle hoogsomer sappigste beste. Maar dis die kombinasie van essensieël Spaanse bestanddele – chorizo, saffraan and sjerrie wat hierdie mossels ekstra interessant maak.

Bedien hulle net so as ’n lekker tapas-styl happie (met ’n koue glas iets byderhand); maak dit ’n meer volledige maal met ciabatta of baguette en ’n groenslaai daarby; of meng dit met linguini vir ’n seekos-pasta met Spaanse ‘flair’.

Al wat jy nodig het is…

1 groot ui, so fyn moontlik gekap
5E goeie olyfolie
200g Spaanse chorizo-wors
3 vet knoffelhuisies, fyn gekap
3E tamatiepuree
½ koppie droë sjerrie (ek het Douglas Green se lieflike Pale Cream Sherry No1 gebruik, lees meer daaroor laer af)
1 x 750g sakkie Italiaanse Roma tamaties, geskil en in klein blokkies gesny (sien Goed Om Te Weet laer af)
1/8t saffraan, geweek in ’n halwe koppie warm water (opsioneel)
sout
1kg vars mossels (groot Woolies takke se visafdelings hou dit dikwels aan)
groot handvol Italiaanse pietersielie, gekap

Braai die uie in die olie oor lae hitte vir vyf minute. Sny die chorizo-wors terwyl die uie braai. Sny die een helfte in klein blokkies en die ander helfte in groter stukke. Voeg die chorizo, knoffel en tamatiepasta by die uie en braai vir ’n minuut of twee. Voeg die sjerrie by en kook vir ’n minuut. Voeg dan die tamatie en saffraan by asook die water waarin die geweek het. (Saffraan verleen ietsie ekstra aan hierdie dis. Dis egter ook duurderig, so as die begroting pla, laat dit uit. Dis steeds nodig om die halwe koppie water by te voeg.) Sit die deksel op en kook oor medium hitte vir 30 minute. Die sous moet aan die droë kant wees, loer dus na 15 minute en verwyder die deksel indien dit te waterig lyk.

Maak die mossels skoon terwyl die tamatiesous kook. Trek enige sigbare baard af (dis nogal nodig om te pluk want die mosselknape klou soms woes vas aan hulle steekbaarde). Spoel die mossels daarna af net om seker te maak daar’s nie sand aan nie.

Proe die tamatiesous vir sout. (Hy sal beslis sout nodig hê, maar hoeveel hang af van die chorizo wat jy gebruik. Begin met ’n halwe teelepel en proe daarna of dit nog aanpas nodig het. Onthou net, sout is geur!

Tuimel die mossels in die tamatiesous, sit die deksel op en kook oor hoë hitte tot die mossels oop en gaar is. Mossels kook vinnig, so twee minute behoort die ding te doen. Gooi die pietersielie oor en bedien dadelik.

bedien

4-6

vooraf

10 min

kook

40 min

scroll-main

goed om te weet

Hoe om maklik tamaties te skil

Om maklik tamaties te skil, sny eenvoudig ’n klein kruis met ’n skerp messie aan die onderkant van elke tamatie. Sit hulle in ’n bak, gooi kookwater oor en laat hulle vir ’n minuut of wat staan. Die skilletjies sal daarna sommer maklik afglip.

scroll

lekker saam met

Sjerrie is ’n knaap wat sommer baie mense verkeerd verstaan. Moenie daaraan dink as iets wat in ’n kristalbottel op ouma se ‘saaidbord’ vergete staan en oksideer terwyl dit wag vir ‘high days’ en ‘holidays’ nie. Nee, dink eerder aan sjerrie as ’n wyn en geniet dit nie net as ’n skemerkelkie op ys nie, maar saam met ’n bord kos soos hierdie mossels met chorizo.

Met ’n alkoholinhoud van hier by die 17% het dit nie veel meer skop as ’n stewige rooiwyn nie. Hou dit in die yskas, bedien dit yskoud en gebruik dit vinnig klaar, nes jy met witwyn sal maak. Een van my absolute top sakpas sjerriekeuses is Douglas Green se Pale Cream No 1.

Dit word in die Jerez-Xérèz streek van Spanje van Palomino-druiwe gemaak, in hout verouder en deur die tipiese sjerrie ‘criadera’ proses gestuur om te vermeng, dus is hierdie die ware Jakob. Dit het wonderlike neut en effense aromatiese blom op die neus en die tong. Dis ’n fees om aan te teug en ek beveel dit hoog aan.

scroll-main

Also available in: English