Wel mense, sedert gister is dit amptelik herfs. Ek weet die kraaie gaap nog van die warm, veral in die noorde. Maar die oggendluggie hier in Kaapstad het nou ’n besliste byt. Ek’s nie jammer nie. Maart en April is my absolute gunsteling tyd van die jaar. Daar’s steeds wonderlike somervrugte soos druiwe, plus plompe herfs bederwe soos diep pers vye en ryprooi granate maak hulle verskyning. Oor so rukkie kom kwepers ook by. Die pampoen familie begin stem dik maak. En dan’s daar die sampioene. Pure herfsvreugde. Na ses maande van blare verorber is ek ‘uitgeslaai’. Ek begin verlang na warmer trooskos. Kos soos risotto.

Stysel is mos soos ’n vloekwoord deesdae. Maar as jy gaan oortree (en regtig, af en toe maak nie seer nie!) doen dit ordentlik. Styselbelaai is Arborio-rys gewis. Dis juis daai stysel wat sorg vir die romerige tekstuur van risotto. Eenvoudiger as sampioen-risotto is daar nie. Jy kan fênsie wees en ’n mengsel eksotiese vars sampioene gebruik plus gedroogde porcini-sampioene vir ekstra diep geur. Maar tye is rof. Die beursie is gevaarlik plat. So hierdie risotto resep gebruik gewone, elke-dag bestanddele wat makliker is om te kry en goedkoper ook. My eerste geheim vir ’n uitstaan sampioen-risotto? Wonderlike sampioen-aftreksel. My gunsteling bekostigbare keuse is by verre Woolworths se Liquid Stock Concentrate Stick Pack.

My tweede geheim? Die beste Parmesaan wat jy kan bekostig. En dan is daar my derde truuk… Ek bedruip die storie net voor die bedien ’n leksel salie bruinbotter, oftewel beurre noisette. Want alles klink mos lekkerder in Frans. Al wat hierdie sakpas sampioen-risotto vra is ’n glas of wat droë witwyn, verkieslik ’n Chardonnay. Sy botterige rondheid in die mond is perfek by hierdie risotto.

Al wat jy nodig het is…

½ koppie fyngekapte sjalotte (gewone witui is gaaf as jy nie sjalotte kan kry nie)
1 vet huisie knoffel, fyn gekap
1E olyfolie
1E gesoute botter
1 koppie rou Arborio-rys
twee-derde koppie Chardonnay (of enige ander droë witwyn)
2 stokkies Woolworths Mushroom Liquid Stock Concentrate
8 koppies kookwater
250g portabellini sampioene, skoongemaak en gekap
½ koppie gerasperde verouderde Parmesan
2E gesoute botter
8 salieblare
swartpeper
ekstra Parmesaan, vir bedien

Kry heel eerste jou aftreksel gereed. Risotto is mos ’n knaap wat bietjies, bietjies vloeistof bykry terwyl jy deurentyd roer, en daardie vloeistof moet warm wees! Sit 8 koppies kookwater in ’n kastrol saam met die twee sakkies aftreksel en laat dit stadig prut. Nou’s jy reg vir risotto maak. Braai die sjalotte in die een eetlepel botter en olyfolie oor lae hitte tot sag – sowat 5 minute. Voeg die knoffel by vir die laaste minuut se braai. Voeg dan die rou rys by en roerbraai dit vir ’n minuut. Voeg die wyn by en laat dit kook vir ’n minuut of wat. Voeg die sampioene by. Nou’s dit tyd vir die aftreksel. Voeg net ’n halwe koppie op ’n keer by en roer aanhoudend. Sodra die vloeistof begin verdwyn, voeg die volgende halwe koppie by. (Ek gebruik gewoonlik ’n volle agt koppies vloeistof op een koppie rys. Jy kan effe minder of meer gebruik, afhangend van hoe vinnig jou risotto kook.) Risotto is nie ’n knaap van wie jy kan wegloop nie, so gooi ’n glas wyn, sit musiek aan en geniet die proses. Sodra die rys gaar is (ek hou van ’n effense al dente byt op my risotto rys, nes ek met pasta verkies), is dit tyd vir proe. Is daar genoeg intense sampioen op die tong? Nee? Roer eenvoudig nog ’n sakkie van Woolies se sampioen konsentraat by. Dis redelik laag in sodium, so dit lewer hope ekstra geur sonder om die hele storie op te dons met vreeslike souterigheid. Roer die Parmesaan in tot dit verdwyn en gee dit ’n stewige vyf draaie swartpeper. Nou’s dit tyd vir proe en sout aanpas indien nodig.

Die salie-bruinbotter vat net ’n paar sekondes om te maak. Sit eenvoudig die twee eetlepels botter in ’n klein staalkastrol (dit moet staal wees sodat jy die kleur van die botter kan sien verander). Voeg die salieblare by en verhit. Die botter sal begin skuim en kort daarna sal die kleur neutbruin word en jy sal die ene neute ruik. Verwyder dit dadelik van die hitte op die stadium anders brand dit. Skep die risotto op, gee elke porsie ’n kunstige halwe lepel leksel bruinbotter en bestrooi met die gebraaide salieblare. Sit dadelik voor.

MY WYNKEUSE HIERBY: JOURNEY’S END HAYSTACK CHARDONNAY 2019

The Gabb familie van Journey’s End buite Stellenbosch fokus op die maak van klein format, top kwaliteit wyne van enkelwingerde. Hulle filosofie is om so min as moontlik in te meng en die natuur sy gang te laat gaan. Hulle Haystack Chardonnay is ’n wonderlike voorbeeld van wat in ’n bottel gebeur met so ’n benadering tot wynmaak. Dis helder en strooikleurig met net ’n titsel groen. Op die neus is daar sitrus, plus ’n subtiele soutbeskuitjie ondertoon. Op die tong is dit lewendig met genoeg suur om dit ’n goeie pasmaat vir kos te maak. Drink dit nou of hou dit in die bottel vir nog ’n jaar of wat. Teen tyd van publikasie is hulle Haystack aanlyn beskikbaar teen R85. Werklik goeie waarde vir wat jy in jou glas kry.

bedien

2

vooraf

10 min

kook

30 min

scroll-main

Also available in: English