Walliese ‘rarebit’. Nog een van daai dinge wat jy eenvoudig nie in Afrikaans kan vertaal nie. Wat is dit? Soortgelyk aan sy Franse neef, Croque Monsieur, is dit basies ’n fênsie manier om te sê geroosterde kaasbroodjie. Anders as sy Franse familie bevat ‘rarebit’ nie ham nie. Haikôna, hy kry… bier. Saam met baie beleë Cheddar vorm dit ’n smaaksensasie waarna jy in die middel van die nag gaan smag.

Soos jy van die naam kan aflei is ‘rarebit’ natuurlik nie ’n Boerse ding nie. Nee met die knaap het ek in London kennis gemaak, donkiejare terug toe ek vir ’n appel en ui in groot kombuise daar gewerk het. Ek het eers gedink hulle praat van haas, soos in ‘rabbit’. Dit het my ’n ruk gevat om die kloutjie by die oor te kry. Vandag is dit een van my kombuis staatmakers vir besige aande, onverwagse gaste of as ek lus kry vir ietsie sout, stout en vinnig.

Daar’s hope resepte vir ‘rarebit’, meeste het een ding in gemeen – die basis is ’n dik kaassous verryk met eiergeel. Dit word op roosterbrood gesmeer, ’n paar minute onder ’n warm rooster en hy’s reg.

Jy kan die bier in die kaassous vervang met sider (te soet vir my), port (te eienaardig) of melk (te bleeksiel). Maar ek laat die keuse hier aan jou oor. Wat nie onderhandelbaar is nie, is baie goeie Cheddar. Die soort wat so verouder is dis krummelrig in plaas van wakserig, en op die tong so pikant dit brand effe. Healey’s se Slow Matured Cheddar is so ’n kaas (lees meer hieroor laer af). Toe ’n blok daarvan dus aan my deur kom klop is ek in my noppies.

Soos julle nou seker al gewoond is kry my ‘rarebit’ resep ’n paar kinkels. In plaas van roosterbrood verkies ek ’n heel baguette in die lengte gesny. Ek gebruik die eierwitte ook (want mens morsie kossie), en bedien Mrs Ball’s se blatjang daarby saam met klein tamaties wat ek met olyfolie en roosmaryn rooster.

Al wat jy nodig het is…

3E gesoute botter
3E koekmeel
1 koppie bier
3 koppies goeie beleë Cheddar, gerasper
1t Dijon-mosterd
1t Worcestershire-sous
groot knip sout
2 eiers, geskei
1 bros baguette

Smelt die botter in ’n dikbodempan oor lae hitte. Roer die meel in. Gooi die bier in terwyl jy deurentyd klits om klonte te vermy. Voeg die mosterd en Worcestershire-sous by en klits in. Kook vir so vyf minute al roerend totdat die sous dik en fluweelglad is. Verwyder van die hitte en voeg die kaas dadelik by. Die hitte van die sous sal die kaas smelt. Roer tot glad, voeg die sout by en proe of hy nog ’n knip of wat nodig het. (Onthou, sout beklemtoon geur.) Laat afkoel vir ’n paar minute en klits dan die eiergele by. Doen jy dit terwyl die sous te warm is, gaan jy opeindig met roereier. As jy meer tradisionele Walliese ‘rarebit’ will maak, smeer hierdie dik sous op roosterbrood en sit dit onder ’n warm rooster tot borrelend goudbruin. Gee hom ’n blerts ekstra Worcestershire-sous en lê weg.

As jy die soufflé roete wil volg, laat die kaasmengsel afkoel tot kamertemperatuur. Berei intussen die baguette. Sny een deur die middel met die lengste langs oop en rooster elke helte vir ’n paar minute tot goudbruin. Klits dan die eierwitte in ’n skoon bak tot styf en wit en vou hulle versigtig by die kaassous in om soveel van die lug as moontlik te behou. Skep die kaasmengsel oor die baguette helftes en bak in ’n voorverhitte 180 grade Celsius oond vir 5-7 minute tot opgepof en goudkleurig. Bedien dadelik want, soos enige ding met die woord soufflé in, verbeter hierdie knaap nie met die staan nie.

bedien

4-6

vooraf

15 min

bak

5-7 min

scroll-main

goed om te weet

Geroosterde tamaties met roosmaryn

Was klein kersietamaties en maak hulle droog. Gee hulle ’n behoorlike blerts olyfolie, breek ’n lang takkie roosmaryn daarby in en tuimel op ’n vlak roosterpan met bakpapier gevoer (vir maklike skoonmaak na die tyd). Gee hulle ’n draai sout, ’n draai swartpeper en rooster vir 10 minute teen 180 grade Celsius.

scroll

Healey’s Slow Matured Cheddar

Healey’s se Slow Matured Cheddar word op die pragtige Waterkloof landgoed in die Kaap gemaak volgens ’n 150-jaar oue resep. Daar’s g’n niks aaklige geel kleursel in nie, niks preserveermiddels nie. Die kaas word toegedraai in moeselien en in grotagtige toestande verouder wat die groei van muf aanmoedig. Nou voor jy eeeuuuw sê, dis juis hierdie behandeling wat Healey’s se Slow Matured Cheddar sy pikante neuterige smaak gee. Dis nie net ek wat dol is oor hierdie kaas nie.

Healey’s het by die 2015 Suid-Afrikaanse Suiwelkampioenskap met die louere weggestap in die 10-18 maande Cheddar kategorie. In 2014 is hulle Slow Matured Single Release Cheddar gekroon as tweede beste ronde Cheddar kaas in die wêreld by die Wêreld Kaas Kampioenskap in die VSA. Nie sleg vir ou melk nie!

Healeys

scroll-main

Ook beskikbaar in: English