{"id":10947,"date":"2021-10-04T12:35:25","date_gmt":"2021-10-04T10:35:25","guid":{"rendered":"http:\/\/www.melkkos-merlot.co.za\/?p=10947"},"modified":"2021-10-08T10:27:38","modified_gmt":"2021-10-08T08:27:38","slug":"appel-botterkoek","status":"publish","type":"post","link":"https:\/\/www.melkkos-merlot.co.za\/af\/appel-botterkoek\/","title":{"rendered":"Appel Botterkoek"},"content":{"rendered":"

Die Kaap het weer vir ons wintertande gewys hierdie afgelope naweek, met droewige, bewolkte koue re\u00ebnweer. Ek kyk met verlangende o\u00eb na die 28 grade van Pretoria op die weervoorspelling en steek maar \u2019n kaggel aan. En ek hark \u2019n paar van ouma se ou kookboeke nader op soek na inspirasie. Daar\u2019s sommer \u2019n hele paar bitter eienaardige resepte in haar spinnekop-krabbel handskriffie. Goed soos gestolde wortelslaai. <\/p>\n

Kyk die dag wat ek gelatien by gerasperde wortels neuk en dit slaai noem het nog nie aangebreek nie. Gaan ook nie. Maar so tussen die kopkrap 1970s resepte is daar ook juwele \u2013 soos hierdie appel botterkoek. Dis nie \u2019n veerligte sponskoek hierdie nie, hy het ietwat meer om die lyf \u2013 dis klam, krummelrig en pure appel en botter. Hierdie botterkoek is beslis beste op die dag wat jy hom bak. Bedien dit nog effe louwarm sodat daai klam botterigheid kan skitter. As jy dit vir tee voorsit, is soet geklopte room met \u2019n skeut brandwyn by \u2019n goeie idee. En as jy dit vir nagereg bedien is warm vla waarvoor hy vra.<\/p>\n<\/div>

<\/div><\/div><\/div>
Al wat jy nodig het is…<\/h5>\n

2\u00bd koppies koekmeel
\n4t bakpoeier
\nklein knippie sout
\n\u00bd koppie suiker
\n250g yskoue gesoute botter (Lurpak, of Kerrygold of Woolies s\u2019n \u2013 niks anders is goed genoeg nie)
\n\u00bd koppie melk
\n2 jumbo-groote eiers
\n1\u00bdt vanielje essens
\n3 Granny Smith appels
\nderde koppie suiker, effens opgehoop
\n1 teelepel kaneel, effens opgehoop<\/p>\n<\/div>

<\/div><\/div><\/div>

Voorverhit jou oond tot 200 grade Celsius. Sif die meel, sout en bakpoeier saam in \u2019n groot mengbak. Voeg die halwe koppie suiker by. Sny 50g van die botter af en hou dit eenkant. Vat dan die orige 200g botter (ek weet dit klink eienaardig, maar dit werk!) en rasper dit by die meel in. (Wenk: as die botter te warm raak en moeilik rasper, plaas dit in die vrieskas vir \u2019n paar minute.)
\n Gebruik \u2019n vurk om die gerasperde botter by die meelmengsel in te roer.<\/p>\n

Klits die eier, melk en vanielje saam en voeg dit by die meel en botter mengsel. Gebruik \u2019n vurk om dit te meng. Dit sal aanvanklik baie klonterig wees maar die lotjie kom tog op die einde bymekaar. Sproei \u2019n 20cm losbodem koekpan met Spray \u2019n Cook en skep die deeg in \u2013 dis \u2019n redelike stywe deeg. Skil en halveer die appels, sny die stronk uit en sny appel in dun skywe. Bedek die deeg met die appels. <\/p>\n

Smelt die orige 50g botter en roer die derde koppie suiker en kaneel by dit in. Sprinkel di\u00e9 mengsel oor die appels. Bak vir 30-40 minute. Toets die botterkoek met \u2019n sosatiestokkie. Kom hy skoon uit is die koek gaar, klou daar deeg aan het die knaap nog \u2019n paar minute nodig. Bedien hierdie botterkoek effe louwarm met geklopte soet room of warm vla.<\/p>\n<\/div>

<\/div><\/div><\/div>

serves<\/h4>\n

8-10<\/p>\n<\/div>

<\/div><\/div><\/div>

prep<\/h4>\n

15 min<\/p>\n<\/div>

<\/div><\/div><\/div>

bake<\/h4>\n

30-40 min<\/p>\n<\/div>

<\/div><\/div><\/div>

Gehou van die resep? Deel dit!<\/h4>
<\/i><\/a><\/span><\/i><\/a><\/span><\/i><\/a><\/span><\/div><\/div>