{"id":10961,"date":"2021-10-08T10:14:51","date_gmt":"2021-10-08T08:14:51","guid":{"rendered":"http:\/\/www.melkkos-merlot.co.za\/?p=10961"},"modified":"2022-08-18T12:33:37","modified_gmt":"2022-08-18T10:33:37","slug":"sjokolade-truffeltert","status":"publish","type":"post","link":"https:\/\/www.melkkos-merlot.co.za\/af\/sjokolade-truffeltert\/","title":{"rendered":"Sjokolade truffeltert"},"content":{"rendered":"

Saterdag, 9 Oktober, is amptelik Pinotage Dag. Ek het nie juis \u2019n verskoning nodig om \u2019n bottel van hierdie eg Suid-Afrikaanse kultivar oop te maak nie, maar toe kry ek een \u00ad\u00ad\u00ad\u00ad\u2013 in die vorm van hierdie resep vir \u2019n sjokolade truffeltert! Die mense van FAT Bastard wyne het dit vir my gestuur want hulle meen dis die ideale soete bederf saam met hulle Pinotage. Met pruime, donker vrugte, sjokolade en mokka op die neus en die tong is hierdie Pinotage \u2019n tonekrul lekkerte. En die truffeltert? Pure verleiding. Sjokolade saam met Pinotage? Verseker!<\/p>\n<\/div>

<\/div><\/div><\/div>

\"scroll-main\"<\/a><\/p>\n<\/div>

<\/div><\/div><\/div>
<\/span>
<\/div><\/div><\/div>

Sjokolade Truffeltert:<\/span> So maklik om te maak en verleidelik verby!<\/p>\n<\/div>

<\/div><\/div><\/div>

\"scroll-main\"<\/a><\/p>\n<\/div>

<\/div><\/div><\/div>

AL WAT JY NODIG HET IS:<\/strong><\/p>\n

VIR DIE TERTDOP<\/strong><\/p>\n

90g versiersuiker
25g kakao
30g amandels, fyn gemaal
120g sagte botter
knippie seesout
1 ekstra-groot eier
220g koekmeel

VIR DIE VULSEL<\/strong><\/p>\n

300g goeie donker sjokolade, met \u2019n 70% kakao inhoud
350ml room
50g heuning<\/p>\n

Spesiale toerusting:<\/strong> 24cm losbodem-tertbak<\/p>\n

Vir bedien:<\/strong> Fyn seesout vlokkies en vars bessies soos framboos en aarbei<\/p>\n

METODE:<\/strong>
OM DIE TERTDOP TE MAAK<\/strong><\/p>\n

Plaas die versiersuiker, kakao en gemaalde amandels in die bak van \u2019n staanmenger. Skakel en aan en meng deeglik. Voeg die sagte botter en sout by en meng goed op lae spoed. NB: Gebruik die \u2018paddle\u2019 om dit te doen, nie die groot klitser stuk nie, jy wil nie lug in die lotjie inklits nie.<\/p>\n

Voeg die eier by en meng tot gekombineer. Voeg die meel by in drie fases. Sodra die meel net-net ingemeng is, skakel die menger af \u2013 dis belangrik om die mengsel nie te oorwerk nie.<\/p>\n

Druk die deeg plat en vorm \u2019n rowwe sirkel. Maak toe in kleefplastiek en plaas in die yskas vir \u2019n uur. (Die deeg kan ook die vorige aand gemaak word. En as jy fluks is kan jy alles met die hand meng. Ek is nie fluks nie\u2026) Bestrooi \u2019n skoon oppervlak met bietjie meel en rol die deeg in \u2019n sirkel uit wat \u2019n paar sentimeter groter as die tertbak is. Rol die deeg om jou koekroller en rol dit versigtig in die tertbak uit. Druk die deeg goed in die tertbak vas, veral in die hoekies waar die tert se basis die kant ontmoet. Gebruik \u2019n skerp messie om die orige deeg gelyk met die rand van die tertbak af te sny. Plaas in die yskas vir 30 minute. Prik die tertbasis met \u2019n vurk en plaas in \u2019n voorverhitte 170\u02daC oond. Bak vir 20-25 minute. Laat die tertdop heeltemal afkoel voor jy dit verwyder en op \u2019n opdienbord plaas.<\/p>\n

OM DIE VULSEL TE MAAK<\/strong><\/p>\n

Kap die sjokolade fyn en plaas dit in \u2019n dubbelkoker. (Of plaas dit in \u2019n glasbak wat netjies oor \u2019n pot pas. Vul die pot met net \u2019n paar sentimeter water en maak seker dat die water nie aan die bodem van die glasbak raak nie.) Smelt die sjokolade en roer af en toe. Verhit die room en heuning saam in \u2019n aparte pot. Verwyder sjokolade van die hitte sodra dit gesmelt is. Voeg die room by die sjokolade in drie sarsies en roer goed na elke toevoeging. (Soos jy die room byvoeg sal dit aanvanklik lyk of die lotjie nie bymekaar gaan kom nie, maar hou moed en hou aan roer \u2013 op die einde sal dit fluweelglad wees.)<\/p>\n

Gooi die warm sjokolade-vulsel in die tertdop en plaas in die yskas om te set. Voor jy bedien bestrooi die tert met \u2019n knippie seesout vlokkies. Sny en sit voor met bessies.<\/p>\n<\/div>

<\/div><\/div><\/div><\/div>