{"id":11536,"date":"2023-05-05T12:36:58","date_gmt":"2023-05-05T10:36:58","guid":{"rendered":"https:\/\/www.melkkos-merlot.co.za\/?p=11536"},"modified":"2023-05-05T12:37:00","modified_gmt":"2023-05-05T10:37:00","slug":"victoria-sponskoek-vir-koning-charles","status":"publish","type":"post","link":"https:\/\/www.melkkos-merlot.co.za\/af\/victoria-sponskoek-vir-koning-charles\/","title":{"rendered":"Victoria sponskoek vir Koning Charles"},"content":{"rendered":"

Kyk ek gaan nie jok nie, m\u00f4re antwoord ek nie my foon nie. Ek gaan te besig wees om tee te drink en Charles en Camilla se kroningsplegtigheid te kyk. Ek het nie juis \u2019n ding vir of teen \u2018royalty\u2019 nie, my gevoelens is neutraal. Maar as dit by prag en praal kom kan absoluut niemand vir die Britte ore aansit nie. Dit gaan \u2018fabulous\u2019 wees! So op die rusbank gaan jy my kry \u2013 in my rekbroek en my hasie-pantoffels, koppie tee in die hand. En as daar tee is moet daar natuurlik koek wees, iets vreeslik Brits.<\/p>\n

Ek kan aan min dinge meer Brits dink as \u2019n klassieke Victoria sponskoek. Toe loer ek na \u2019n paar resepte \u2013 Nigella s\u2019n, Dehlia s\u2019n, Jamie s\u2019n. Hulle is almal basies dieselfde, almal eintlik \u2019n kopie van die doyenne van Britse gebak, Mary Berry, se Victoria spons. Mary se resep is eenvoudig, sy gooi alles bymekaar, meng dit en dis oond toe. Toe volg ek dit en\u2026 dis \u2019n kolossale flop. Niks fout met die smaak nie, maar die koek wou g\u2019n niks behoorlik rys nie en hy was erg kluitjierig. \u2019n Victoria sponskoek is weliswaar swaarder as baie ander sponskoeke, maar wat uit daai panne gekom het was nie skoumateriaal nie. Toe maak ek hom weer. Ek volg Mary se resep, maar ek gooi haar metode by die venster uit. Ek maak hom eerder aan soos ouma my geleer het mens \u2019n koek maak \u2013 verroom eers die suiker en botter, dan kom die nat goed by en heel laaste die dro\u00eb bestanddele. Die resultaat? Victoria sponskoek perfeksie \u2013 krummelrig, dig maar nie te dig nie en ryk van die botter. Tradisioneel plak jy \u2019n Victoria sponskoek vas met aarbei- of frambooskonfyt en geklopte room. Maar hierdie is koningskoek, dus gee ek die knaap \u2019n groot skep room bo-op ook, plus vars aarbeie en bloubessies \u2013 al die kleure van die Britse vlag in \u2019n koek.<\/p>\n

Hierdie spons is definitief nie een wat wil rondhang nie, hy\u2019s beste die dag wat jy hom maak. As jy hom nege uur m\u00f4reoggend maak is hy betyds reg voor daai groot goue koets sy verskyning maak.<\/p>\n<\/div>

<\/div><\/div><\/div>
Al wat jy nodig het is…<\/h5>\n

225g strooisuiker
\n225g ongesoute botter, baie sag (soos botter teen warm kamertemperatuur)
\n4 jumbo-grootte eiers
\n2E melk (Mary se resep bevat dit nie, maar ek het hare bietjie te dik gevind)
\n225g self-rys meel (self-raising flour)
\n2t bakpoeier
\nknippie sout (Mary se resep het nie sout in nie, maar ouma het my geleer alle soetgoed het \u2019n blertsie sout nodig!)
\n250ml vars room
\n2E versiersuiker
\naarbeikonfyt
\nvars aarbeie
\nvars bloubessies<\/p>\n<\/div>

<\/div><\/div><\/div>

Voorverhit jou oond tot 180 grade Celsius (170 as jy jou thermofan gebruik). Sny twee sirkels uit bakpapier en plaas hulle op die bodem van twee 20cm losbodem koekpanne. Spuit die res van die pan met nie-kleef baksproei of maak soos ouma gemaak het en smeer hulle met botter.<\/p>\n

Gebruik \u2019n elektriese handklitser om die botter en suiker te klop tot lig en romerig. Klits die eiers saam met die melk en voeg dit dan \u2019n bietjie op \u2019n slag by die bottermengsel terwyl jy klits. (Onthou om die kante van die bak af te skraap.)
\nSif die meel, bakpoeier en sout by en gebruik \u2019n groot metaallepel om die meel versigtig in te vou. Moenie die mengsel oorwerk nie, hou op meng sodra die lotjie bymekaar kom!<\/p>\n

Verdeel die mengsel tussen die twee panne en gebruik die agterkant van \u2019n lepel om dit egalig te maak. Bak vir 25 to 30 minute tot goudkleurig en deurgebak. Jy sal weet die koek is reg as jy \u2019n tandestokkie insteek en hy kom skoon uit. (NB: voor jy die oond oopruk, loer eers deur die oonddeur of die koek gerys en goudkleurig is. Indien nie, is hy waarskynlik nog baie rou binne en maak jy die deur in di\u00e9 stadium oop val die lot plat!)<\/p>\n

Laat die koek in die pan afkoel vir vyf minute en keer dit dan uit op \u2019n draadrak om heeltemal af te koel. Klop die room met die versiersuiker tot styf en plak die twee koeke aan mekaar vas met konfyt en room. Skep ongesond baie room bo-op en gaan mal met die vrugte!<\/p>\n<\/div>

<\/div><\/div><\/div>

bedien<\/h4>\n

10<\/p>\n<\/div>

<\/div><\/div><\/div>

vooraf<\/h4>\n

20 min<\/p>\n<\/div>

<\/div><\/div><\/div>

bak<\/h4>\n

30 min<\/p>\n<\/div>

<\/div><\/div><\/div>

Gehou van die resep? Deel dit!<\/h4>
<\/i><\/a><\/span><\/i><\/a><\/span><\/i><\/a><\/span><\/div><\/div>