Mense\u2019s nie almal dieselfde nie en dis goed so, want anders was die w\u00eareld seker \u2019n vale plek. Maar dis juis hierdie andersheid van mense wat neuk as dit kom by resepte skryf. <\/p>\n
Vat my vriendin Bettie (nie haar regte naam nie, want nou-nou is sy vies). Sy pik-pik soos \u2019n mossie aan \u2019n bord kos. Na so vyf happies kyk sy my verle\u00eb aan met sulke groot gogga-oge, hopende dat ek nie te veel aanstoot sal neem nie. Gelukkig is ek nou al gewoond daaraan. Dan\u2019s daar my ander vriendin, ons noem haar maar Poppie. Sy skep groot en ek kan sien net ordentlikheid keer dat sy haar bord uitlek. Ek\u2019s \u00earens tussenin. Dis hoekom ek s\u00ea \u2019n resep bedien 8-10, of soos die geval met hierdie pastaresep, 4-6. Ek weet mos nou nie of die wat by jou kom aansit Betties of Poppies is nie.<\/p>\n
Die lekker ding van hierdie resep is hy\u2019s so ryk en geurig dat jy hom kan rek tot hy bl\u00ear. Skep eenvoudig meer pasta en minder lam. Lam is duur, so vir hierdie resep gebruik ek sommer \u2019n pak stowe skaapvleis met die taaier dele van die dier wat lank kook nodig het. As jy dit ordentlik doen het hy \u2019n hele paar ure op die stoof of in \u2019n lae oond nodig. Maar as mens goedkoop betaal vir die vleis, wil jy nou nie duur betaal aan die \u2018letricity\u2019 nie. So ek verneuk en blits hom vir 50 minute in my drukkoker. As hy daar uitkom is hy uitmekaar-val sag en omtower in \u2019n dik, donker pastasous (of soos die f\u00eansie mense s\u00ea, \u2019n ragu) wat my laat kraai van plesier. <\/p>\n<\/div>
2 groot wortels, geskil
\n1 groot ui, geskil
\n1 groot stingel seldery, blare verwyder
\n50g spek, gekap
\n1kg stowe skaapvleis met die been in (maak seker daar is \u2018n hele paar stukke nek by)
\n2E koekmeel
\n350g ryprooi vars tamaties (of een blik tamaties)
\n\u00bct growwe swartpeper
\n1 blokkie skaapaftreksel, opgelos in 3 koppies kookwater
\n2 vars lourierblare (droog sal doen as vars nie beskikbaar is nie)
\n1E vars origanum (of droog, gebruik net effe minder)
\nolyfolie vir braai
\nparmesaan-kaas, vir bedien (opsioneel)
\npietersielie en origanum of ment, vir bedien<\/p>\n<\/div>
Sit die wortels, ui en seldery in \u2019n voedselverwerker en kap fyn. Sit die meel op \u2019n bord en doop die vleisstukke daarin. Braai die vleis in die olyfolie op medium-ho\u00eb hitte tot bruin aan albei kante. (Begin met so twee eetlepels olie en gooi by as jy nog nodig het. Baie belangrik: Braai net \u2019n paar stukke vleis op \u2019n slag. Sit jy die lot op een slag by, verlaag die temperatuur van die pan te veel en jy\u2019t waterige gestoomde vleis in plaas van lekker gekarameliseerde vleis!)<\/p>\n
Skep die vleis uit en braai die gekapte groente en spek in dieselfde pan vir so 5 minute. Roer goed sodat die vloeistof in die groente help om die gekarameliseerde bruin lekkerte op die bodem van die pan te lig. Kap en gooi die tamaties by. (Hulle m\u00f3\u00e9t ryprooi wees, blekes sal nie die ding doen nie.\u00a0 <\/span>As jy nie ryp grotes kan kry nie, gebruik sommer klein kersietamaties, hulle is meestal ryper en beter as grotes. \u2019n Behoorlike sjef sal nou s\u00ea gooi kookwater oor die tamaties om die skille te verwyder, maar ek bodder nie.) Voeg die vleisaftreksel, peper, lourierblare en origanum by en kook in jou drukkoker (hy moet lustig fluit) vir 50 minute. Loer en kyk of hy van die been afval. As hy doen, is hy reg.<\/p>\n Verwyder die bene en vlok die vleis en sit dit terug op die stoof om te verhit. As hy in die stadium nog te veel vloeistof het, kook hom sonder die deksel tot die sous dik genoeg is na jou smaak \u2013 jy soek nie \u2019n dun ding nie. Proe vir sout en sit voor met pasta van jou keuse. Ek het tuisgemaakte pappardelle pasta gebruik, maar linguine of fettuccine sal ook deug. Bedien met \u2019n titsel fyn kruie soos pietersielie en gekapte origanum of ment asook parmesaan-kaas.<\/p>\n<\/div> 4-6<\/p>\n<\/div> 10\u00a0min<\/p>\n<\/div> 70\u00a0min<\/p>\n<\/div>bedien<\/h4>\n
vooraf<\/h4>\n
kook<\/h4>\n
Gehou van die resep? Deel dit!<\/h4>