{"id":3352,"date":"2014-11-26T13:44:48","date_gmt":"2014-11-26T11:44:48","guid":{"rendered":"http:\/\/www.melkkos-merlot.co.za\/?p=3352"},"modified":"2022-08-18T12:16:13","modified_gmt":"2022-08-18T10:16:13","slug":"anthonij-rupert-wyne-franschhoek","status":"publish","type":"post","link":"https:\/\/www.melkkos-merlot.co.za\/af\/anthonij-rupert-wyne-franschhoek\/","title":{"rendered":"Anthonij Rupert Wyne \u2013 Franschhoek"},"content":{"rendered":"

Begeerte is \u2019n lelike ding. Met die dat ek gewikkel is in \u2019n konstante stryd om \u2019n beter mens te wees, probeer ek dit liefs vermy. Maar twee Saterdae terug kom plak die duiwel hom lustig op my skouer neer \u2013 en hy klou.<\/p>\n

Die moelikheid het begin met \u2019n uitnodiging om te kom kuier by Anthonij Rupert Wyne<\/a> buite Franschhoek. Ek weet my nigs en neefs van daar bo dink onse mense hier in die Kaap l\u00ea heeldag en aldag lank op wynplase rond. Maar dissie so nie. Ons werk ook. Dus was die vooruitsig om my gewone Saterdag se wasgoed en stofsuiery vir wynproe te ruil tog te gaaf.<\/p>\n

Nou my normale strategie met wynproe is om twee wynplase te tref en dan te stop vir middagete by \u2019n derde. Maar as Anthonij Rupert Wyne op jou lys is kan jy maar van ander vergeet, want h\u00ed\u00e9r kan jy heeldag lank kuier.<\/p>\n

Ry deur imposante hekke en op met \u2019n laning eeuoue bome en jy kom uit by die Anthonij Rupert<\/a> proelokaal in \u2019n ou herehuis met geelhout vloere, reuse kaggels, prag skilderye, antieke meubels\u2026 die lot. D\u00eds mos nou my idee van \u2019n proelokaal. Ag die begeerte tog.<\/p>\n

Hier kan jy hulle top Anthonij Rupert wynreeks proe asook hulle Cape of Good Hope wyne (\u2019n inisiatief van Johann Rupert om die oudste wingerde vanoor die Kaap op te spoor en te bewaar). Die proe storie vind plaas in groeperings van eenderse wyne en die prys hang af van wat jy proe. Jy kan hier vashaak en \u2019n kaasbord bestel. Of jy kan n\u00e1 die wynproe vir \u2019n paar ure in hulle prag sitkamer terugsit en oor \u2018high tea\u2019 skinner en kuier. <\/p>\n<\/div>

<\/div><\/div><\/div>

\"scroll-main\"<\/a><\/p>\n<\/div>

<\/div><\/div><\/div>
<\/span>
<\/div><\/div><\/div>

Anthonij Rupert Wyne:<\/span> Kom spandeer die dag, jy sal nie spyt wees nie.<\/p>\n<\/div>

<\/div><\/div><\/div>

\"scroll-main\"<\/a><\/p>\n<\/div>

<\/div><\/div><\/div>

Maar ek het ander planne gehad, so na die proe is ek vort op die plaasbus, spesiaal gebou om soos \u2019n egte San Francisco tr\u00eam lyk. Ons vat die plaas se agterpaaie en ek sit terug en begeer<\/del> bewonder. Om \u2019n paar draaie, verby \u2019n dam en spogperde, op met nog \u2019n laning en uiteindelik is ons by ons bestemming \u2013 die Franschhoek Motormuseum<\/a> wat op die L\u2019Ormarins gedeelte van die plaas is. Hier huisves vier reuse f\u00eansie \u2018skure\u2019 die beste motorversameling op die vasteland, waarskynlik een van die bestes in die w\u00eareld. Van die eerste Model A Ford wat in 1914 na Suid-Afrika ingevoer is, tot blinkrooi Ferraris (ja-nee, die begeerte) \u2013 jy sal sommer vinnig besef jy hoef nie kar befoeterd te wees om hierdie museum te waardeer nie. En \u2013 iets wat my hart sommer warm maak \u2013 elke liewe bordjie is in Afrikaans, so ook die motormuseum se webwerf<\/a>. Oulike Afrikaanse mense, di\u00e9 Ruperts. <\/p>\n

Al die begeerte maak \u2019n pop nogal honger, so terug op die plaastr\u00eam mik ek vir die hipermoderne Terra del Cappo proelokaal<\/a> en antipasto restaurant. Hier kan jy hulle Italiaans ge\u00efnspireerde Terra del Cappo wyne proe (Pinot Grigio, Sangiovese en meer) asook hulle sakpas elke-dag Protea reeks wyne. As jy eers besluit het wat jou geval, bestel \u2019n glas of \u2019n bottel en l\u00ea weg aan hulle antipasto \u2013 wit ansjovis, bros kalamari, sappige lamtjoppies en veel meer\u2026 Dis heerlik, die porsies groot vir antipasto en die pryse baie goed in vergelyking met soortgelyke antipasto\/tapas spyskaarte op ander wynplase. <\/p>\n

Teug, knabbel en sit gemaklik terug terwyl jy deur die restaurant se glasmuur loer na waar Terra del Cappo se bottels volgemaak word. As die honger nie meer knaag nie, maak \u2019n draai by die landgoed se winkel langs die restaurant. Laai jou mandjie vol heuning en olyfolie van die plaas, mooi glase, wonderlike kombuisgoeters en natuurlik WYN.<\/p>\n

Met dank aan die toegewyde span by Anthonij Rupert Wyne vir die uitnodiging en ‘n wonderlike dag.<\/em><\/p>\n<\/div>

<\/div><\/div><\/div><\/div>