{"id":3499,"date":"2015-01-07T15:35:07","date_gmt":"2015-01-07T13:35:07","guid":{"rendered":"http:\/\/www.melkkos-merlot.co.za\/?p=3499"},"modified":"2022-08-18T12:16:47","modified_gmt":"2022-08-18T10:16:47","slug":"lanzerac-landgoed-stellenbosch","status":"publish","type":"post","link":"https:\/\/www.melkkos-merlot.co.za\/af\/lanzerac-landgoed-stellenbosch\/","title":{"rendered":"Lanzerac landgoed, Stellenbosch"},"content":{"rendered":"

My eerste ontmoeting met Lanzerac<\/a> was toe ek agt was. En magtie het di\u00e9 plek \u2019n indruk gemaak. \u2018Obviously\u2019 nie met hulle wyn nie. Nee, vir \u2019n poniestert, kaalvoet, loopneus dogtertjie al die pad van die Transvaal af, was die Kaaps Hollandse herehuis van Lanzerac die kat se snor. <\/p>\n

Dis die laaste keer wat ek op Lanzerac<\/a> was\u2026 tot so twee weke terug, toe die vrinlike mense van di\u00e9 eeue oue wynplaas my nooi om te kom rondloer en wyn proe. Dertig jaar (plus\/minus natuurlik) is \u2019n lang tyd. Sou alles nog dieselfde lyk?<\/p>\n

Jip, dis so mooi soos ek dit onthou en mooier by die dag, want die Lanzerac lot woel en hulle\u2019t groot planne. Eerste aan die beurt loop maak ek \u2019n draai by hulle wynproe lokaal. Nou as ek aan Lanzerac dink, dink ek outomaties eerste ros\u00e9 \u2013 in \u2019n oulike bottel met wulpse vrouekurwes. En dan dink ek Pinotage, want Lanzerac was eerste om hierdie eg Suid-Afrikaanse kultivar te bottel. Hulle maak dit steeds, m\u00e1\u00e1r dis nie al wat hulle doen nie. Onder leiding van wynmaker, Wynand Lategan, en \u2019n toegewyde wynspan, maak Lanzerac wonderlik komplekse vyfster wyne.<\/p>\n

Die proelokaal<\/a> is onlangs heeltemal oorgedoen en ek het net een woord daarvoor \u2013 luuks. Dink akkerhout muurpanele, kristalkandelare, diep gestoffeerde stoele… OK misien twee woorde \u2013 luuks verby. Maar nie op \u2019n manier wat my ongemaklik laat voel nie. Neewat, daarvoor is die mense hier te gemoedelik. <\/p>\n<\/div>

<\/div><\/div><\/div>

\"scroll-main\"<\/a><\/p>\n<\/div>

<\/div><\/div><\/div>
<\/span>
<\/div><\/div><\/div>

Lanzerac landgoed, Stellenbosch:<\/span> Luuks verby!<\/p>\n<\/div>

<\/div><\/div><\/div>

\"scroll-main\"<\/a><\/p>\n<\/div>

<\/div><\/div><\/div>

Lanzerac het drie wynreekse<\/a> \u2013 daar\u2019s hulle spotgoedkoop elkedag reeks (onder R40) genaamd Alma Mater \u2013 seker nie verbasend nie, met die dat die Maties kampus net \u2019n katspoegie weg is. Dan\u2019s daar hulle Premium enkelvari\u00ebteit reeks wyne (vanaf R80) en hulle top Heritage reeks. Teen R250 vir die goedkoopste, is hierdie topvlak \u2019n bietjie ryk vir my bloed, maar die Premium reeks is \u2019n fees.<\/p>\n

Al drie reekse is beskikbaar vir proe. Die een wat ek sal aanbeveel as \u2019n ongewone en spesiale wynproe ondervinding, is hulle R70 opsie van vyf Premium wyne saam met sjokolade. Die sjokolade word spesiaal vir hulle gemaak met geure wat mik om die geure in die wyne te beklemtoon. As sjokolade nie jou ding is nie maar jy wil aan iets knaag terwyl jy proe, kies die R75 opsie van vier wyne saam met \u2019n Boerenkaas verskeidenheid. <\/p>\n

Val by hulle pragtige deli langs die proelokaal in na die tyd. Of gaan vir die groot bederf en klim die trappe na hulle piekniek terras met \u2019n mandjie gepak met die wonderlikste kase, charcuterie, brode, patee en piekels. Skiet die prop op \u2019n bottel Lanzerac MCC, tuur na die berge in die verte en vergeet jou sorge.<\/p>\n<\/div>

<\/div><\/div><\/div><\/div>