{"id":7445,"date":"2016-02-08T08:18:05","date_gmt":"2016-02-08T06:18:05","guid":{"rendered":"http:\/\/www.melkkos-merlot.co.za\/af\/?p=7445"},"modified":"2022-08-18T12:28:05","modified_gmt":"2022-08-18T10:28:05","slug":"suurlemoen-bloubessie-roomys","status":"publish","type":"post","link":"https:\/\/www.melkkos-merlot.co.za\/af\/suurlemoen-bloubessie-roomys\/","title":{"rendered":"Suurlemoen-bloubessie roomys"},"content":{"rendered":"

Die kraaie gaap hier in die Kaap. Met die kwik die laaste paar weke te dikwels aan die verkeerde kant van dertig is dinge lelik aan\u2019t huise van Melkkos & Merlot, want sien \u2019n swembad die het ons nie. Dan\u2019s daar net een genade \u2013 semi kaalbas onder die sproeier in die agterplaas. Gelukkig (miskien meer so vir my bure as vir my) is my mure hoogerig. <\/p>\n

En as my buitekant eers koel is het my binnekant ook aandag nodig. \u2019n Kolossale bak roomys doen die ding. Ek\u2019t heelwat room (op die randjie van af) oorgehad van \u2019n advertensie waaraan ek gewerk het vir \u2019n Duitse suiwelmaatskappy. Mens morsie kossie, so tuisgemaakte roomys was die antwoord. Ek\u2019t ook bloubessies oorgehad van dieselfde joppie. So hier\u2019s hy: my suurlemoen-en-bloubessie roomys. Vars, verfrissend, belaglik maklik en soveel lekkerder as die winkel ding.<\/p>\n<\/div>

<\/div><\/div><\/div>
Al wat jy nodig het is…<\/h5>\n

1.5L koue room (Pick n Pay se 1L bottels room is die beste waarde)<\/p>\n

500ml koue melk<\/p>\n

2\u00be koppies strooisuiker<\/p>\n

fyngerasperde skil en sap van 4-5 suurlemoene (proe en sien hoe pikant jy daarvan hou)<\/p>\n

1 koppie vars bloubessies (gevries deug ook)<\/p>\n<\/div>

<\/div><\/div><\/div>

Kombineer die room, melk en 2\u00bd koppies van die suiker in \u2019n groot mengbak. Gebruik \u2019n elektriese handklitser en klits tot goed dik \u2013 dit vat \u2019n hele paar minute. Roer die suurlemoensap en skil by. (Ek het suurlemoen gebruik want dis wat in die koskas was, maar ek dink lemmetjie sal selfs lekkerder saam met die bloubessie wees.)<\/p>\n

As jy \u2019n roomysmasjien het, gebruik hom om jou roomys tot op \u2018soft serve\u2019 stadium te kry. As jy nie \u2018n masjien het nie, doen dit die outydse manier \u2013 met jou elektriese handklitser en geduld. Sit eenvoudig die roomys in die vrieskas, verwyder en klits dit goed elke uur om enige yskristalle op te breek. Hou so aan tot die roomys dik \u2018soft serve\u2019 is. (Hierdie resep maak baie roomys, so as jy dinge vinniger wil laat vries, verdeel die mengsel in drie kleiner bakke.)<\/p>\n

Maak intussen die bloubessiesous. Kook eenvoudig die bessies en orige suiker saam tot jy \u2019n lielike stroperige j\u00eammerige mengsel het. Verwyder en koel af in die yskas. As jou roomys \u2018soft serve\u2019 dik is, skep dit in jou opdienbak, skep die bessiesous versigtig oor en gebruik die kant van \u2019n paletmes om die sous in \u2019n fraai riffel-patroon in die roomys in te vou. Plaas in die vrieskas tot solied gevries.<\/p>\n

Lus vir ietsie meer tradisioneel? Probeer my outyde Idealmelk roomys<\/a>. Dis nes ouma dit gemaak het!<\/p>\n<\/div>

<\/div><\/div><\/div>

maak<\/h4>\n

3,5L<\/p>\n<\/div>

<\/div><\/div><\/div>

vooraf<\/h4>\n

30 min<\/p>\n<\/div>

<\/div><\/div><\/div>

vries<\/h4>\n

6 ure<\/p>\n<\/div>

<\/div><\/div><\/div>

Gehou van die resep? Deel dit!<\/h4>
<\/i><\/a><\/span><\/i><\/a><\/span><\/i><\/a><\/span><\/div><\/div>