Nog net so 6 weke se slapies en dis Kersfees mense. Waar gaan die tyd? Ek het natuurlik al Kersfees op die brein sedert hier middel Augustus se kant. Dis maar hoe dit in die kosstilering w\u00eareld is. Kli\u00ebnte soek hulle resepte en kiekies woes vroeg. Nie dat ek omgee nie, dis my gunsteling tyd van die jaar \u2018after all\u2019.<\/p>\n
Sjokolade-salami is \u2019n ideale poeding vir die feestyd. Dis vinnig, dis maklik, dit lyk indrukwekkend en dis verleidelik verby. Vleis is daar nie in hierdie knaap nie. Di\u00e9 deel van sy naam kry hy van sy vorm. Wat hy wel bevat, is onbeskof baie sjokolade.<\/p>\n
Meeste sjokolade-salami resepte het gekapte koekies in. Niks daarmee fout nie. Maar ek soek iets veel luukser, iets perfek vir belangrike dae en feestafels. Dus laat ek die koekies uit en speel met neute en dro\u00eb kersies wat ek in brandewyn week. Tog te feestelik. Meeste resepte gebruik ook eiers en botter, maar ek gebruik dubbel-dik room. Dus is hierdie sjokolade-salami nie hard soos meeste ander nie. Nee, hierdie knaap is sag soos fluweel \u2013 veilig selfs vir Oom Samie met die valstande. Dink daaraan as \u2019n reuse salami-vormige sjokolade-truffel. Bedien dit met vars kersies en goeie vanielje-roomys en almal sal dink jy\u2019s die kat se snor.<\/p>\n<\/div>
VIR DIE SJOKOLADE-SALAMI
\n100g dro\u00eb kersies (jy kan ook dro\u00eb bosbessies \u2018cranberries\u2019 gebruik)
\n\u00bc koppie brandewyn (ek gebruik KWV se 3-jaar-oud vir al my kook en bak)
\n250ml dubbel-dik room (Woolworths \u2018Ayershire double thick cream\u2019)
\n100g 70% donkersjokolade (ek het Lindt gebruik)
\n3 x 80g melksjokolade stafies (ek het Cadbury\u2019s gebruik)
\n100g amandels, liggies gerooster in \u2019n dro\u00eb pan en rofweg gekap (of gebruik \u2019n mengsel amandels, haselneute en pistasieneute)
\n2E kakao
\n1E versiersuiker
\nVIR BEDIEN
\nekstra kakao en versiersuiker
\nvars kersies
\nvanielje roomys<\/p>\n<\/div>
Verhit die brandewyn en gooi dit oor die dro\u00eb kersies. Laat die kersies vir ten minste \u2019n halfuur staan voor jy hulle dreineer. Hoe langer, hoe beter. Breek die sjokolade in klein blokkies en plaas in \u2019n groot glasbak. Plaas die bak op \u2019n kastrol water wat liggies kook, maar moenie dat die glasbak aan die water raak nie. Roer af en toe en verwyder van die hitte sodra die sjokolade gesmelt is.<\/p>\n
Voeg die res van die bestanddele by die sjokolade, meng deur en laat afkoel vir ten minste \u2019n uur sodat dit makliker is om te vorm. Sif \u2019n groot stuk bakpapier mildelik met kakao. Gebruik \u2019n groot lepel om die sjokolade in die middel van die bakpapier te skep. Mik vir \u2019n 20cm \u2018wors\u2019. Vou die bakpapier oor die sjokolade-salami en masseer dit liggies tot jy \u2019n perfekte ronde salami-vorm het. Druk die kante toe, amper soos \u2019n groot Kersklapper en plaas in die yskas om af te koel vir ten minste vier ure. (Dit hou vir \u2019n week in jou yskas, so jy kan dit vooruit maak.)<\/p>\n
Hierdie sjokolade-salami moet fluweelsag en verleidelik op die tong wees. Haal dit dus 30-60 minute voor jy bedien uit die yskas. Ek\u2019s doelbewus frustrerend vaag hier want as dit so warm is dat die kraaie gaap, gaan hy natuurlik vinniger reg wees vir bedien. Plaas die heel sjokolade-salami op \u2019n fraaie bord, sif kakao en versiersuiker kunstig oor en bestrooi mildelik met vars kersies. Dra dit tafel toe en hoor hoe jou mense \u2018ooh\u2019 en \u2018aaah\u2019.<\/p>\n<\/div>
10-12<\/p>\n<\/div>
60 min<\/p>\n<\/div>
4 ure<\/p>\n<\/div>