{"id":8634,"date":"2018-06-29T10:54:13","date_gmt":"2018-06-29T08:54:13","guid":{"rendered":"http:\/\/www.melkkos-merlot.co.za\/af\/?p=8634"},"modified":"2022-08-18T12:08:57","modified_gmt":"2022-08-18T10:08:57","slug":"heel-geroosterde-skaapnek","status":"publish","type":"post","link":"https:\/\/www.melkkos-merlot.co.za\/af\/heel-geroosterde-skaapnek\/","title":{"rendered":"Heel geroosterde skaapnek"},"content":{"rendered":"

Raakvatters. D\u00eds wat ouma se generasie vrouens was. Daar\u2019s tonne goed wat ouma toe-oog kon doen wat vandag grootliks vergete is. Vir sommige het ek nie juis in 2018 nut nie. Soos om beesvet in seep te verander. Mens, die h\u00e9le kombuis ruik. Ek koop eerder daai oranje Pears-sepie. Of soos om doilies en jassies vir houthangers te hekel. Tierlantyntjies vir uitstal op \u2019n doilie die het ek nie. En my hangers is plastiek. Ek koop hulle 10 vir R30 van die knaap wat op die hoek van Parkweg en Liesbeek smous.<\/p>\n

Ouma se manier met kos is \u2019n perd van \u2019n ander kleur. Ek wens ek het meer tyd gehad om by haar te leer. Botter karing, kaas maak, troukoek versier\u2026 Alles kinderspeletjies vir ouma. En dan was daar haar manier met vleis. Sy was miskien nie \u2019n raps oor die vyf voet nie, maar daai vrou kon \u2019n vark of skaap karkas in onder \u2019n halfuur eiehandig kafdraf en in die vrieskas kry. \u2019n Bees het haar miskien bietjie langer gevat, maar nie veel nie.<\/p>\n

En as die slag verby was, was daar die kook. Lank en stadig in \u2019n lae oond was hoe sy dit verkies het, perfek vir enige boud, maar ook vir ander dele. Dele soos nek. Ouma het haar heel skaapnek net gesout, bruin gebraai in beesvet (oftewel \u2018dripping\u2019 soos sy dit genoem het) en in die oond gesit. Wat daar uitgekom het na vier ure was hemels.<\/p>\n

Ek maak soos sy gemaak het, maar neem dit \u2019n stappie verder. Die heel skaapnek sit ek op \u2019n bed wortels, klein uitjies en kruie. As hy eers sag is gooi ek botterbone by en druk hulle met \u2019n vurk in daai lamryke roostersousie in, en dan kry hy gremolata. Dis heel skaapnek, \u00e1mper soos ouma hom gemaak het.<\/p>\n<\/div>

<\/div><\/div><\/div>
Al wat jy nodig het is…<\/h5>\n

1 medium-groot heel skaapnek
\n4 groot wortels, geskil en in groterige stukke gesny
\n6-8 pekel-uie, geskil en in die helfte gesny met die lengte langs
\n2 heel huisies knoffel, ongeskil
\n2 takkies tiemie
\n1 takkie roosmaryn
\n2 lourierblare (vars, nie gedroog nie)
\n\u00bd koppie water
\nsout en peper
\ngoeie olyfolie
\n1 blik botterbone, gedreineer
\ngroot handvol pietersielie, sonder stingels
\n1 suurlemoen<\/p>\n<\/div>

<\/div><\/div><\/div>

Voorverhit jou oond tot 160 grade Celsius. Pak die wortels en uie in \u2019n groot roosterbak met \u2019n deksel. Sit die tiemie, roosmaryn, knoffel en lourierblare by en gee die lot \u2019n klein skeut olyfolie, \u2019n paar draaie sout en growwe swartpeper. Verhit \u2019n dikbodempan en gee dit \u2019n blerts olyfolie. Bestrooi die skaapnek mildelik met sout en verbruin dit alkant in die olyfolie. Sit die skaapnek op die groente, gooi die water by, sit die deksel op en gooi die knaap in die oond vir vier ure.<\/p>\n

Na vier ure behoort hy smelt-in-die-mond sag te wees . Gooi die botterbone by en roer deur sodat dit met die groente in die bodem meng. Rooster vir \u2019n verdere halfuur sonder die deksel sodat daai vetlagie van die nek lekker brosbruin word. Druk die knoffel (wat teen die tyd puree sal wees) uit hulle huisies en roer in die groente in. Gee die groente \u2019n drukkie suurlemoensap, en proe of dit nog sout of peper nodig het. Bedien die skaapnek op die groente en strooi pietersielie gemeng met fyn gerasperde suurlemoenskil oor die lot. \u2019n Paar bitter blare soos roket gekus met olyfolie en suurlemoensap is heel gaaf hierby. Ek is meer van die dik-eet as dun-eet oortuiging. \u2019n Hele nek is egter te veel vir my. Hierdie resep gemaak met \u2019n 15cm skaapnek is meer as genoeg vir twee om aan te smul.<\/p>\n<\/div>

<\/div><\/div><\/div>

bedien<\/h4>\n

2<\/p>\n<\/div>

<\/div><\/div><\/div>

vooraf<\/h4>\n

15 min<\/p>\n<\/div>

<\/div><\/div><\/div>

kook<\/h4>\n

4.5 ure<\/p>\n<\/div>

<\/div><\/div><\/div>

Gehou van die resep? Deel dit!<\/h4>
<\/i><\/a><\/span><\/i><\/a><\/span><\/i><\/a><\/span><\/div><\/div>