{"id":9750,"date":"2020-08-11T13:47:38","date_gmt":"2020-08-11T11:47:38","guid":{"rendered":"http:\/\/www.melkkos-merlot.co.za\/af\/?p=9750"},"modified":"2022-08-18T12:26:07","modified_gmt":"2022-08-18T10:26:07","slug":"bloubessie-poeding","status":"publish","type":"post","link":"https:\/\/www.melkkos-merlot.co.za\/af\/bloubessie-poeding\/","title":{"rendered":"Bloubessie-en-port skonpoeding"},"content":{"rendered":"

Lente wink! Hier en daar is \u2019n bloeisel wat kop uitsteek; die kat\u00a0dring nie meer aan op lepel l\u00ea die hele nag lank nie; en die vo\u00ebltjies koer my al vroe\u00ebr wakker. Maar twee koue fronte kort na mekaar in die Kaap die laaste paar dae wys winter is nog nie klaar met ons nie. Winterkos soek ek steeds \u2013 bredies en sop en gebakte warm poedings. Iets soos hierdie bloubessie-en-port skonpoeding.<\/p>\n

In Amerika noem hulle di\u00e9 tipe poeding \u2013 bestaande uit \u2019n vrugtebasis gebak met hompies deeg bolaag \u2013 \u2019n \u2018cobbler\u2019. My woordeboek gee my net \u2018skoenmaker\u2019 as vertaling vir \u2018cobbler\u2019, en met skoene het hierdie bloubessie fees natuurlik niks te make nie. So, reg of verkeerd, besluit ek in Afrikaans doop ek hierdie knaap \u2019n skonpoeding.<\/p>\n

Amerika is inderdaad die heimat van die \u2018cobbler\u2019. Soos met menige horingoue resep, was nood en skaarste die inspirasie. Blykbaar kon Engelse setlaars nie maklik hande l\u00ea op die harde niervet wat hulle verkies het vir gebakte poedings nie. Oonde was daar ook nie noodwendig nie. Skeppies skon-erige deeg op \u2019n laag vrugte en \u2019n warm oop vuur was hulle oplossing, en drie honderd jaar later maak hulle dit steeds.<\/p>\n

Appels en perskes is baie gewild vir Amerikaanse skonpoedings, maar baie ander vrugte werk of goed \u2013 appelkose, pruime, kersies en enigiets in die bessie-familie. Toe die mense van De Krans<\/a> my vra om iets vir hulle op te tower met hulle port-styl Cape Ruby, was bloubessies onmiddelik in my kop. Soos menige staatmaker ouma-tipe resep is \u2019n \u2018cobbler\u2019 of skonpoeding eenvoudig om te maak en soete sielsvreugde om te eet. \u2019n Groot skep vanielje-roomys of dubbel-dik room hierby en \u2019n glasie of wat van De Krans se Cape Ruby<\/a> en ek\u2019s reg om die laaste wintermaand te weerstaan soos \u2019n vaskopstut.<\/p>\n<\/div>

<\/div><\/div><\/div>
Al wat jy nodig het is…<\/h5>\n

Vir die vrugtelaag<\/strong>
\n5 koppies vars of gevriesde bloubessies
\nderde koppie suiker
\n1 hoogvol eetlepel Maizena
\n\u00bd teelepel fyn kaneel
\nskil van een lemoen, baie fyn gerasper
\nderde koppie water
\n\u00bd koppie De Krans Cape Ruby<\/p>\n

Vir die deeglaag<\/strong>
\n1\u00be koppies koekmeel
\nknippie sout
\n1E bakpoeier
\n\u00bd koppie strooisuiker
\n100g koue botter, in klein blokkies gesny
\n1 eier
\n\u00bc koppie room
\nderde koppie melk
\n1E bruin suiker<\/p>\n<\/div>

<\/div><\/div><\/div>

Plaas die bloubessies in \u2019n oondvaste bak saam met die Maizena, suiker, kaneel en lemoenskil. Roer om te meng. Gooi die port en water by. Plaas in \u2019n voorverhitte 180 grade Celsius oond vir 10 minute. Maak intussen die deeg bolaag. Sit die meel, sout, bakpoeier, strooisuiker en botter in jou voedselverwerker en pols tot die botter in die meel verdwyn. (As jy nie \u2019n voedselverwerker het nie, maak soos ouma sou gemaak het en vryf die botter in die meel in met die punte van jou vingers.)<\/p>\n

Klits die eier, melk en room goed saam, voeg by die meelmengsel en pols nog \u2019n paar keer tot die deeg net bymekaar kom. Skep eetlepels van die deeg op die vrugte, bestrooi deeg met bruin suiker en plaas terug in die oond vir nog 20-25 minute tot die skon bolaag goudbruin en deurgebak is. Bedien dadelik met vanielje-roomys, room of maskarpone.<\/p>\n

Nog opsies vir hierdie resep:<\/strong><\/p>\n